Rama: Kurti deshi të ndryshonte emrin e Lojërave Mesdhetare

PRISHTINË — Kryetari i Prishtinës, Përparim Rama, ka deklaruar se kryeministri Albin Kurti kishte kërkuar që të ndryshohej emri i Lojërave Mesdhetare nga «Prishtina 2030» në «Kosova 2030», si dhe kishte kërkuar të bëhej vetë kryetar. Sipas Ramës, zyrtarët organizatorë nga jashtë janë skandalizuar nga këto veprime, ndërsa Qeveria e Kosovës, e cila udhëheq Komitetin Organizativ, po rrezikon organizimin e lojërave përmes mospërgjigjes institucionale.

Rama ka njoftuar se më 19 dhjetor do të shqyrtohet situata përmes një Asambleje të Jashtëzakonshme ku do të vendoset për të ardhmen e këtij eventi ndërkombëtar. Ai theksoi se Prishtina ka përmbushur detyrat e veta, përfshirë hartimin e masterplanit dhe identifikimin e lokacioneve, por tani organizimi rrezikohet për shkak të mungesës së veprimeve nga institucionet qendrore. Në anën tjetër, ministri i Sportit, Blerim Gashani, ka përjashtuar mundësinë e dështimit.