Kurti kërkon presidentin për Vetëvendosjen — paralajmëron zgjedhje të reja
Lideri i LDK-së, Lumir Abdixhiku, u shpreh se Vetëvendosje nuk pranon që partia e tij të propozojë emrin për të parin e shtetit.
PRISHTINË — Kryeministri në detyrë, Albin Kurti, ka deklaruar se posti i presidentit i takon Lëvizjes Vetëvendosje nëse subjektet nuk arrijnë një emër konsensual. Kurti e cilësoi mbështetjen e kaluar për Vjosa Osmanin si vendim të marrë në rrethana të jashtëzakonshme të pandemisë.
Sipas tij, rregulli politik tregon se presidenti nuk ka ardhur asnjëherë nga opozita. Lideri i Vetëvendosjes theksoi se partia e tij ka shënuar fitore të jashtëzakonshme në zgjedhje dhe, nëse në skenën politike mbizotërojnë superambiciet e të tjerëve, atëherë nuk ka kuptim të mbahen zgjedhje fare.
Në këtë kuadër, Kurti shtoi se zgjedhja e kryetarit dhe nënkryetarit të Kuvendit mbetet e kotë pa pasur marrëveshje të plotë për postin e kreut të shtetit. Ai paralajmëroi se në rrethana të tjera, ku ky akord mungon, vendi do të shkojë sërish në zgjedhje të parakohshme.
Nga ana tjetër, kryetari i Lidhjes Demokratike të Kosovës, Lumir Abdixhiku, konfirmoi se partia e tij po kërkon të propozojë emrin për president. Kjo kërkesë po kundërshtohet nga Vetëvendosja, duke e lënë LDK-në larg një marrëveshjeje bashkëpunimi me partinë fituese.
Burim: Vox Kosova
— Redaksia ZHURMA