LDK larg marrëveshjes me LVV-në — Abdixhiku sheh rrugë pa krye

PRISHTINË — Kryetari i Lidhjes Demokratike të Kosovës, Lumir Abdixhiku, ka deklaruar të premten se kjo parti është shumë larg arritjes së një marrëveshjeje koalicioni me Lëvizjen Vetëvendosje. Kjo deklaratë erdhi menjëherë pas përfundimit të takimit me Albin Kurtin, ku u diskutua për mundësitë e bashkëpunimit.

Abdixhiku u shpreh se për LDK-në nuk ka asnjë arsye për të vonuar konstituimin e Kuvendit dhe zgjedhjen e kryetarit e të kryesisë, duke shtuar se kjo është përgjegjësi e partisë së parë. Ai theksoi se pa një balancë institucionale nuk mund të ketë marrëveshje politike dhe se vonesat vetëm sa e vështirësojnë procesin.

Lideri i LDK-së shtoi se ka treguar vullnet të mirë për të gjetur një zgjidhje, por konstatoi me keqardhje se aktualisht janë në një rrugë pa krye. Sipas tij, shkaktimi i zgjedhjeve të reja është i lehtë, por qëllimi i partisë së tij ka qenë gjetja e një zgjidhjeje funksionale.

Burim: Ekonomia Online
— Redaksia ZHURMA