Rama akuzon Vetëvendosjen se po bllokon projektet në Prishtinë

Kryetari i Prishtinës, Përparim Rama, ka lëshuar akuza të forta ndaj Lëvizjes Vetëvendosje dhe qeverisë qendrore, duke e cilësuar subjektin e drejtuar nga Albin Kurti jo si parti politike, por si një lloj sekti që përdor frikësimin dhe shantazhin për të bllokuar projektet madhore të kryeqytetit.

Raportet midis Komunës së Prishtinës dhe pushtetit qendror kanë pasur vazhdimisht përplasje lidhur me realizimin e punëve publike. Rama ka theksuar se gjatë dy viteve të para të mandatit të tij ka kërkuar në mënyrë të përsëritur bashkëpunim institucional me qeverinë e udhëhequr nga kryeministri Albin Kurti.

Sipas kryetarit Përparim Rama, përpjekjet e nivelit qendror janë të fokusuara në sabotimin e iniciativave infrastrukturore në kryeqytet. I pari i Prishtinës pretendoi gjatë intervistës se nga ana e qeverisë nuk ka pasur asnjëherë vullnet për dialog, duke përmendur se si ai, ashtu edhe kryeministri, janë të zgjedhur nga populli për t'u shërbyer qytetarëve dhe jo për të luftuar me njëri-tjetrin. Ndër të tjera, Rama përmendi me emra projekte të ndryshme infrastrukturore të cilat po përballen me pengesa dhe bllokada nga pushteti qendror.

Lidhur me rrjedhën e mëtejshme politike dhe qasjen e tij ndaj ekzekutivit, i pari i Prishtinës u shpreh se nëse problemi kryesor mbetet keqpërdorimi nga niveli qendror, ai do ta luftojë atë për të mbrojtur interesat e kryeqytetit.

Gjatë paraqitjes në emisionin «DPT te Fidani» në Klan Kosova, Përparim Rama deklaroi se e ka thënë tash e tri vite një vlerësim të tillë për subjektin politik në pushtet. «Këta nuk janë as parti politike. Unë e kam thënë që tri vite që ky është një lloj sekti. Domethënë njëfarë mendësie e mbrapshtë që vetëm saboton, shantazhon, frikëson, e përdor frikën si një mjet të fortë për me i shti njerëzit me u bërë me ta në bazë të frikës», tha Rama.