Kurti flet në Paris për hekurudhat, ndalet treni Prishtinë-Pejë

PRISHTINË — Më 9 nëntor 2026, treni i vetëm që operon në Kosovë në linjën Prishtinë-Pejë ndali qarkullimin për shkak të grevës së paralajmëruar nga organizatat sindikale të Infrakos-it, ndërmarrjes përgjegjëse për menaxhimin e infrastrukturës hekurudhore. Trainkos njoftoi se treni nr. 4201 që niset nga Prishtina në orën 07:50 do të ndërpresë qarkullimin në Fushë Kosovë, pasi në orën 08:00 Infrakos ndalon ofrimin e shërbimeve, ndërsa të gjithë trenat e tjerë do të pushojnë së qarkulluari deri në normalizimin e situatës.

Një ditë pas ndërprerjes së qarkullimit, gjatë qëndrimit në Francë për Forumin e Paqes dhe në një intervistë të dhënë të martën për Radio France Internationale, kryeministri Albin Kurti foli për projekte të mëdha hekurudhore dhe stabilitet institucional. «Herën e parë, nuk u lejua konstituimi i Kuvendit, herën e dytë nuk u lejua zgjedhja e presidentit, ndërkaq pas herës së tretë e kemi konstituuar edhe Kuvendin edhe e kemi zgjedhur Qeverinë, edhe e kemi zgjedhur presidenten e re. Kemi stabilitet të plotë institucional 4 vite përpara, kemi shumë projekte përpara, sikurse ato infrastrukturore për hekurudha dhe për diga», deklaroi ai.

Përveç hekurudhave, kryeministri përmendi edhe projektin e ndërtimit të pesë digave, por shifrat e Projektbuxhetit tregojnë financim më të ulët se kostoja e paraparë prej rreth gjysmë miliardi euro. Për vitin 2027 janë paraparë 1.5 milionë euro, ndërsa deri në vitin 2029 shuma e planifikuar arrin në 28 milionë euro.