Kadrijaj kërkon përgjigje nga Qeveria për marrëveshjen e Asociacionit

Gjatë diskutimit parlamentar për Raportin e Progresit, deputetja e Aleancës Time Kadrijaj ka kritikuar performancën e ekzekutivit, duke theksuar se në vend të progresit vendi po ballafaqohet me mungesë të rezultateve konkrete. Ajo vlerësoi se dokumenti për vitin 2026 më mirë do të ishte të quhej raport i regresit dhe se ekziston një hendek shqetësues ndërmjet zotimeve të Qeverisë dhe gjendjes që qytetarët përjetojnë çdo ditë.

Kadrijaj u shpreh e çuditur pse përfaqësuesit e Qeverisë ende thirren në të kaluarën dhe në pengesat nga zhvillimet gjeopolitike, duke përmendur se më parë si arsyetime për reformat e parealizuara janë përdorur pandemia dhe lufta në Ukrainë. Veç tjerash, ajo kërkoi llogari nga përfaqësuesit qeveritarë lidhur me zbatimin e marrëveshjeve me Bashkimin Evropian, duke u ndalur te çështja e Asociacionit të komunave me shumicë serbe. «A na tregoni, o vlla a e keni pranuar këtë marrëveshje apo jo, sepse Bashkimi Evropian po kërkon zbatimin e saj», deklaroi deputetja, duke shtuar se përgjegjësia i takon këtij pushteti që e ka arritur marrëveshjen.