Kosova luan ndeshjen kthyese ndaj Italisë në futsall

Kombëtarja e Kosovës në futsall luan sot ndeshjen kthyese ndaj Italisë në kuadër të Grupit 10 të raundit kryesor kualifikues për Kupën e Botës 2028, me fillim nga ora 20:00 në palestrën “PalaDisfida” në Barletta. Dardanët kërkojnë të marrin një rezultat pozitiv në këtë sfidë të tretë eliminatore.

Kjo përballje vjen menjëherë pas takimit të parë midis dy përfaqësueseve që u zhvillua të premten e kaluar në Pallatin e Rinisë në Prishtinë. Në atë përballje mjaft të luftuar, lojtarët e Kosovës pësuan disfatë të ngushtë me rezultatin 4:3 ndaj italianëve. Më efikasi te përfaqësuesja kosovare në atë ndeshje ishte Ramadan Alaj që shënoi dy gola, ndërsa një gol tjetër e realizoi Fitim Krasniqi. Më parë, në ndeshjen e saj hapëse të këtij cikli eliminator, Kosova kishte triumfuar me rezultatin 3:2 kundër përfaqësueses së Gjeorgjisë.

Sa i përket gjendjes me tabelën, Italia kryeson renditjen e Grupit 10 me gjashtë pikë të grumbulluara. Kosova mban pozitën e dytë me tri pikë, ndërsa Gjeorgjia renditet e fundit në grup pa asnjë pikë. Rregullorja e kualifikimeve përcakton se kalimin direkt në fazën “Elite Round” do ta sigurojnë 12 fituesit e grupeve, së bashku me katër ekipet më të mira që renditen në vendet e dytë. Tetë përfaqësueset e tjera që do të përfundojnë në pozitën e dytë do të përballen në plejof për një mundësi të mëtejshme. Nga ajo fazë e plejofit, vetëm katër përfaqësuese do të arrijnë të avancojnë në fazën përfundimtare eliminatore.

Sa i përket sfidave të ardhshme, pas duelit të sotëm në Barletta, Kosova do të vazhdojë rrugëtimin e saj në këto eliminatore më 24 shkurt, ditë kur do të luajë ndeshjen tjetër me Gjeorgjinë.