Komisioni Evropian: Kosova kritikohet për të drejtat e LGBTIQ+

Në raportin e fundit të publikuar për Kosovën, Komisioni Evropian on vlerësuar se mbrojtja ligjore e të drejtave të personave LGBTIQ+ mbetet e pamjaftueshme dhe se ky komunitet vazhdon të përballet me diskriminim të vazhdueshëm në shoqëri.

Sipas gjetjeve të prezantuara në dokument, Strategjia dhe Plani i Veprimit për të drejtat e personave LGBTIQ+, të cilat është dashur të miratohen që nga viti 2024, ende nuk janë miratuar nga autoritetet kompetente. Po ashtu, Komisioni Evropian vëren se nuk janë zhvilluar aktivitete zyrtare për vetëdijesimin e publikut lidhur me këto të drejta.

Në raport theksohet gjithashtu se mungojnë njohja dhe mbrojtja ligjore për çiftet e të njëjtit seks, ndërsa miratimi i Kodit Civil, prej të cilit pritej trajtimi i kësaj çështjeje, nuk ka shënuar asnjë përparim. Personat LGBTIQ+ vazhdojnë të përballen me diskriminim në hapësirat publike, në vendet e punës dhe në diskursin publik, përfshirë periudhën e fushatës zgjedhore.

Dokumenti evidenton se dhuna në internet mbetet e pranishme, ndërsa normat patriarkale dhe tradicionale kontribuojnë në diskriminimin dhe refuzimin e tyre brenda familjeve. Sa i përket rasteve të dhunës, Komisioni Evropian bën të ditur se numri i incidenteve të raportuara ka mbetur i qëndrueshëm, ndërsa Java e Krenarisë dhe Parada e Krenarisë, të mbajtura në qershor të vitit 2026, u zhvilluan pa incidente.

Raporti vë në pah edhe mungesën e theksuar të shërbimeve publike, ku organizatat e shoqërisë civile mbeten ofruesit e vetëm të shërbimeve shëndetësore, psikosociale dhe juridike, kurse zvogëlimi i financimit rrezikon qëndrueshmërinë e këtyre shërbimeve, sipas vlerësimeve të dala nga ky dokument.