Kurti dhe Osborn diskutojnë hapat e parë të industrisë së mbrojtjes

Kryeministri i Kosovës, Albin Kurti, i shoqëruar nga komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim Agjutantin e Përgjithshëm të Gardës Kombëtare të Ajovës, gjeneralmajor Stephen E. Osborn. Gjatë këtij takimi të zhvilluar në Zyrën e Kryeministrit, palët kanë hedhur dritë edhe te hapat e parë dhe me rëndësi të veçantë drejt zhvillimit të industrisë së mbrojtjes në vend.

Kryeministri ka shprehur mirënjohje për mbështetjen e pandërprerë të Gardës Kombëtare të Ajovës në procesin e transformimit, modernizimit dhe ngritjes së kapaciteteve të FSK-së. Sipas tij, partneriteti i Republikës së Kosovës është i dyfishtë, me shtetin e Ajovës dhe me Shtetet e Bashkuara të Amerikës, duke u fokusuar në trajnime profesionale, edukim, lidership ushtarak, si dhe planifikim operacional e logjistik.

Gjatë bisedimeve është trajtuar gjithashtu situata e sigurisë në Kosovë dhe rajon. Bashkëbiseduesit janë dakorduar për rëndësinë dhe rolin kyç që ka Republika e Kosovës në ruajtjen e stabilitetit në Ballkanin Perëndimor.