Ku po shkon Kosova për gazin amerikan?

— Kryeministri në detyrë i Kosovës, Albin Kurti, ka bërë të ditur se Qeveria po shqyrton mundësinë e përdorimit të gazit të lëngëzuar amerikan (LNG) në kuadër të strategjisë afatgjatë për diversifikimin e burimeve të energjisë. Deklarata u bë gjatë ceremonisë së vendosjes së gurthemelit për ndërtimin e një parku solar me kapacitet prej 105 megavatesh në Rahovec, ku Kurti theksoi se synimi është që vendi të modernizojë sektorin energjetik duke ruajtur një qasje më të përgjegjshme ndaj përdorimit të thëngjillit.

Sipas tij, një nga opsionet që po shqyrtohet është furnizimi me gaz të lëngëzuar nga Shtetet e Bashkuara, përmes bashkëpunimit me Shqipërinë dhe përdorimit të infrastrukturës së termocentralit të Vlorës. Deklarata vjen në një kohë kur Qeveria e Kosovës është përballur me kërkesa të vazhdueshme nga partnerët ndërkombëtarë, përfshirë Ambasadën e SHBA-së në Prishtinë, si edhe nga odat ekonomike dhe opozita, për t’iu bashkuar projekteve të gazit amerikan.

Nëse realizohet, projekti do të përfaqësonte një hap të rëndësishëm drejt rritjes së sigurisë energjetike të Kosovës dhe uljes së varësisë nga burimet tradicionale të energjisë. Burim: Report Tv, https://report.al/albin-kurti-zbulon-planin-energjetik-kosova-po-shqyrton-perdorimin-e-gazit-amerikan-permes-shqiperise/ — Redaksia ZHURMA