Si synon Kosova të forcojë tregun përmes akreditimit?
Çfarë rolit luajnë standardet evropiane në konkurrueshmërinë e ekonomisë kosovare?
PRISHTINË — Cilësia, siguria dhe besueshmëria e produkteve u cilësuan elemente kyçe për zhvillimin ekonomik dhe qasjen në tregjet ndërkombëtare, në Ditën Botërore të Akreditimit të organizuar nga Drejtoria e Përgjithshme e Akreditimit.
Ministrja në detyrë e Ndërmarrësisë, Mimoza Kusari-Lila, tha se akreditimi është një nga mekanizmat kryesorë që garanton cilësinë e produkteve dhe shërbimeve. Ajo njoftoi se po punohet në përafrimin e kornizës ligjore me legjislacionin e Bashkimit Evropian, në përputhje me obligimet nga Marrëveshja e Stabilizim-Asociimit, si dhe në ristrukturimin organizativ të ministrisë dhe agjencive të saj.
Boguslaw Gertruda, udhëheqës i Sektorit për Çështje Politike, Ekonomike dhe Integrim në Zyrën e BE-së në Kosovë, theksoi se Plani i Rritjes i BE-së i ofron Kosovës mundësinë të integrohet në zinxhirët e vlerës. Ai shtoi se vlerësimi i konformitetit dhe akreditimi i produkteve në sektorët e industrisë dhe bujqësisë luajnë rol kyç, veçanërisht për bizneset eksportuese.
Maureen Logghe, drejtoresha e përgjithshme e organit belg të akreditimit BELAC dhe presidente e Organizatës Evropiane për Bashkëpunim në Akreditim, vlerësoi përmes video-mesazhi punën e Drejtorisë së Akreditimit të Kosovës. Ajo inkurajoi institucionin të ecë në hap me zhvillimet teknologjike dhe të sigurojë që vlerësimet të mbeten të qëndrueshme, të paanshme dhe të besueshme.
Dita Botërore e Akreditimit shënohet çdo vit për të promovuar rolin e akreditimit në garantimin e standardeve, sigurisë dhe besueshmërisë në tregjet moderne.
Burim: Zëri, http://www.zeri.info/ekonomia/626277/kosova-synon-forcimin-e-tregut-permes-akreditimit-dhe-cilesise/
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.