Kosova rritet 5.4%, por konsumi bie 0.9% e inflacioni kalon 6% — më i larti në rajon

PRISHTINË — Konsumi privat i familjeve në Kosovë ra 0.9 për qind gjatë tremujorit të parë të 2026-ës, ndërsa inflacioni kapërceu 6.0 për qind — norma më e lartë në mbarë Ballkanin Perëndimor, sipas Bankës Qendrore të Kosovës (BQK). Kjo ndodhi edhe pse ekonomia u zgjerua me 5.4 për qind.

Sipas BQK-së, kjo rritje nuk erdhi nga forcimi i kërkesës së konsumatorëve. Ndonëse ministri në detyrë i Financave u mburr së fundi me shifrën, motori kryesor ishin eksportet neto dhe shpenzimet shtetërore, ndërsa konsumi familjar dha ndikim negativ të drejtpërdrejtë. Në fillim të 2025-ës, konsumi privat ishte zgjeruar me 6.2 për qind.

Kontributet: eksportet neto 2.8 pikë përqindjeje, konsumi qeveritar 2.5 pikë, investimet 1.0 pikë, konsumi privat minus 0.8 pikë. Qeveria rriti shpenzimet publike me 16.5 për qind, pas rënies prej 9.3 për qind vitin e kaluar, duke zbutur rënien e konsumit. Investimet u rritën 3.0 për qind, por u zbehën te projektet publike dhe importi i makinerive.

Inflacioni tejkaloi tremujorin paraprak dhe mesataren rajonale prej 3.7 për qind. BQK-ja thotë se rritja e çmimeve po ushqehet tashmë nga presione të brendshme, veçanërisht te shërbimet. Për tërë 2026-ën, banka qendrore parashikon inflacion mesatar 6.7 për qind, me rrezik real për shifër edhe më të lartë.

Raporti thekson edhe varësinë e Kosovës nga importi: nga 1.6 miliardë euro mallra të blera jashtë, eksportet arritën vetëm 226.6 milionë euro — duke mbuluar 14.0 për qind të blerjeve totale.

Burim: Nacionale
— Redaksia ZHURMA