Klinika për Sëmundjet e Fëmijëve: Sigurohet “Trikafta” për 126 pacientë

Klinika për Sëmundjet e Fëmijëve në Shkup ka njoftuar se terapia moderne “Trikafta” do të jetë në dispozicion për 126 pacientë me fibrozë cistike në Maqedoninë e Veriut. Sipas njoftimit zyrtar të këtij institucioni shëndetësor, nga ky vit ilaçi do t’u ofrohet të gjithë pacientëve mbi moshën dyvjeçare, të cilët plotësojnë kriteret dhe kanë indikacion të përshtatshëm mjekësor për këtë trajtim.

Fibroza cistike përbën një sfidë të madhe mjekësore, ndërsa institucionet shëndetëtoare kanë ndërmarrë hapa për përmirësimin e qasjes në barna inovative. Përfaqësuesit e shëndetësisë theksojnë se sigurimi i barnave moderne përfaqëson një domosdoshmëri për trajtimin e duhur të sëmundjeve të rënda mushkërore te fëmijët dhe të rriturit në vend.

Sipas të dhënave të bëra publike nga Klinika për Sëmundjet e Fëmijëve, “Trikafta” është një terapi moderne moduluese që ndihmon drejtpërdrejt në përmirësimin e funksionimit të proteinës CFTR, dëmtimi i së cilës qëndron në themel të zhvillimit të kësaj sëmundjeje gjenetike. Përmes këtij mekanizmi, ilaçi ndikon në lehtësimin e gjendjes shëndetësore të të sëmurëve.

Nga ana e tyre, ekspertët e klinikës shpjegojnë se rezultatet e studimeve klinike dëshmojnë se kjo terapi mund të sjellë përmirësim të ndjeshëm të funksionit të mushkërive. Gjithashtu, sipas të gjeturave klinike të përmendura nga institucioni, përdorimi i këtij ilaçi ndihmon dukshëm edhe në ngritjen e cilësisë së jetës te pacientët që kanë karakteristikat e përshtatshme gjenetike për trajtim.

Zgjerimi i qasjes në këtë trajtim të synuar vlerësohet nga autoritetet shëndetësore si një hap i rëndësishëm përpara në trajtimin e fibrozës cistike në vend. Institucioni ka bërë të ditur se procesi i sigurimit të terapisë synon mbulimin e të gjithë personave që përmbushin kushtet e përcaktuara mjekësore.