Klekovski: Po përgatitet Ligj i ri për Barnat

Autoritetet po përgatisin një ligj të ri për barnat që synon përafrimin e plotë me legjislacionin evropian, pasi ligji aktual daton nga viti 2007 dhe ka pësuar më shumë se 20 ndryshime deri më tani. Ministri i Shëndetësisë, Sasho Klekovski, njoftoi për këtë nismë pas një konsultimi kombëtar të mbajtur në bashkëpunim me Organizatën Botërore të Shëndetësisë, ku morën pjesë përfaqësues të shoqatave të pacientëve, odave dhe industrisë farmaceutike, ekspertë, si dhe institucione qeveritare.

Sipas Klekovskit, kuadri i ri ligjor do të rregullojë ekskluzivisht fushën e barnave, ndërsa pajisjet mjekësore do të rregullohen me ligje të veçanta, kurse në fazën e ardhshme parashihet edhe miratimi i një ligji të posaçëm për veprimtarinë farmaceutike. Ndër risitë kryesore janë vendosja e procedurës së detyrueshme për raportimin e mungesës së barnave nga prodhuesit dhe bartësit e autorizimeve, trajtimi i falsifikimit të barnave si vepër penale përmes harmonizimit me Kodin Penal, si dhe rregullat e reja për raportimin e efekteve të padëshiruara. Klekovski theksoi se për çdo detyrim të ri duhet të përcaktohet qartë se kush e zbaton, me çfarë kuadrosh e mjetesh dhe brenda cilit afat, ndërsa në bashkëpunim me Agjencinë për Barna dhe Pajisje Mjekësore do të hartohet një plan për zbatimin e ligjit.