Janevska: Personi në Shtip është zbuluar dhe do të mbajë pasojat

Policia ka nisur një hetim ndaj një punonjësi të Universitetit Goce Dellçev në Shtip, nën dyshimet për ndërhyrje dhe korrigjime të paautorizuara të notave e rezultateve të provimeve në sistemin kompjuterik të këtij institucioni të arsimit të lartë.

Ministrja e Arsimit dhe Shkencës, Vesna Janevska, deklaroi se autoritetet e rendit dhe drejtësisë po veprojnë lidhur me këtë rast. «Personi është zbuluar, po zhvillohet një hetim dhe ai do të vazhdojë të mbajë të gjitha pasojat për aktivitetet e paligjshme që ka kryer», u shpreh ajo, duke u bërë thirrje qytetarëve dhe studentëve që të denoncojnë çdo dukuri të paligjshme.

Janevska shtoi se pavarësisht procesit të digjitalizimit, ekziston gjithmonë mundësia e ndikimit të faktorit njerëzor dhe e abuzimeve, prandaj është thelbësore që veprime të tilla të identifikohen dhe të ndëshkohen në kohë. Sipas saj, Inspektorati Shtetëror i Arsimit vepron kudo që ka raportime, ndërsa tashmë janë duke u zhvilluar edhe procedura të tjera gjyqësore për raste të ngjashme.