Këmbësorja humb jetën në Prishtinë pasi goditet nga autobusi

PRISHTINË — Një aksident trafiku me fatalitet ka ndodhur te Stacioni i Autobusëve në kryeqytet, ku një grua ka pësuar lëndime të rënda trupore pasi është goditur nga një automjet transporti publik. Sipas Policisë së Kosovës, drejtuesi i autobusit ishte një mashkull kosovar, ndërsa viktima një femër e cila u dërgua menjëherë për trajtim mjekësor në Qendrën Klinike Universitare të Kosovës.

Pavarësisht ndërhyrjes mjekësore, ajo nuk ka mundur t'i mbijetojë plagëve të marra dhe ekipi mjekësor ka konstatuar vdekjen e saj në spital. Me vendim të prokurorit kompetent, shoferi i dyshuar është arrestuar dhe dërguar në masën e mbajtjes policore, ndërkohë që autoritetet e rendit kanë nisur hetimet për të zbardhur rrethanat e plota të ngjarjes.