Këlliçi: Asnjë polic i ndaluar për dhunën ndaj studentëve

Në protestat e studentëve, rreth një mijë të rinj janë shoqëruar dhe arrestuar, duke përfshirë dyqind e pesëdhjetë të mitur, ndërsa dhjetëra persona kanë mbetur të plagosur nga dhuna policore gjatë dy javëve të fundit, sipas të dhënave të bëra publike nga deputeti dhe nënkryetari i Partisë Demokratike, Belind Këlliçi.

Vala e protestave dhe e revoltës studentore ka përfshirë vendin, ku të rinjtë dhe gjimnazistët kanë dalë në sheshe për të kundërshtuar situatën, ndërsa situata është shoqëruar me përplasje dhe ndërhyrje të forcave të rendit përpara institucioneve shtetërore.

Deputeti dhe nënkryetari i Partisë Demokratike, Belind Këlliçi, ka deklaruar përmes rrjeteve sociale se Prokuroria e Tiranës nuk ka ndërmarrë asnjë masë ndaj efektivëve dhe drejtuesve të policisë që janë përfshirë në dhunimin e protestuesve. Sipas Këlliçit, megjithëse kanë kaluar gati dy javë nga nisja e protestave dhe pavarësisht pamjeve e dëshmive të publikuara për dhunën ndaj të rinjve, ende nuk është ndaluar asnjë efektiv apo drejtues policie. Deputeti demokrat onte se gjatë kësaj periudhe janë shoqëruar dhe arrestuar rreth 1 mijë të rinj, ndërsa dhjetëra persona kanë mbetur të plagosur nga ajo që ai e cilëson si terror policor. Ai ka kërkuar gjithashtu dorëheqjen e kryeministrit Edi Rama, duke e lidhur aksionin e forcave të rendit me përpjekjet për të ruajtur pushtetin e kreut të qeverisë.

Në vijim të reagimit të tij, deputeti i Partisë Demokratike i është drejtuar drejtpërdrejt drejtuesit të organit të akuzës për veprimet e deritanishme. «Edhe sa kohë i duhet prokurorit të Tiranës, Arenc Çela, që të bëjë detyrën për të cilën paguhet?!», shprehet Këlliçi, duke bërë thirrje që institucionet e drejtësisë të reagojnë ndaj dhunës së pretenduar policore gjatë protestave.