Erjon Vishkulli lëndohet rëndë në sy nga plumbi i gomës gjatë protestës në Tiranë

TIRANË — Drejtuesi i tifogrupit të Kombëtares Shqiptare Tifozat Kuq e Zi, Erjon Vishkulli, ka marrë një lëndim të rëndë në sy pasi u qëllua me plumb gome nga një pjesëtar i policisë shqiptare gjatë protestës së zhvilluar në Tiranë, ku po kërkohet dorëheqja e kryeministrit Edi Rama.

Protestat në Shqipëri filluan nga kërkesat e studentëve për kushte më të mira dhe u shndërruan në tubime të dhunshme. Manifestimi i zhvilluar më 24 tetor shënoi protestën e 12-të në kryeqytet, e cila u shoqërua me përplasje mes protestuesve dhe Policisë së Shtetit, si dhe dëmtime të pronës publike e private. Përpjekjet e forcave të rendit për shpërndarjen e turmave përfshijnë përdorimin e mjeteve të ndryshme për të boshatisur rrugët dhe bulevardin.

Gjatë përleshjeve në terren, tetë persona janë lënduar në protestë, sipas të dhënave që ka dhënë Ministria e Shëndetësisë mbi gjendjen e tyre. Në spitalet e qytetit po trajtohen policë dhe protestues të dëmtuar, mes të cilëve edhe Erjon Vishkulli. Tifogrupi Tifozat Kuq e Zi njoftoi në faqen zyrtare në Facebook se drejtuesi i tyre po merr trajtim mjekësor në spitalin e Tiranës. Gjatë përplasjeve janë hedhur molotovë dhe lëndë piroteknike përballë Kishës Katolike, me ç'rast një zyrtar policor u përfshi nga flakët dhe koshave të mbeturinave u është posur flaka. Ndërkaq, protestuesit janë zhvendosur drejt sheshit Skënderbej duke qëlluar me gurë e molotovë, ndërsa efektivët e policisë janë përgjigjur për të shpërndarë turmën. Po ashtu, gazetari i News24, Klevin Muka, deklaroi se u godit me sprej piperi gjatë raportimit në terren më 24 tetor, duke pësuar skuqje.

Lidhur me ngjarjen e rëndë, kryetari i Grupit Parlamentar të Partisë Demokratike, Gazment Bardhi, i ka kërkuar zyrtarisht Prokurorisë së Tiranës që të nisë menjëherë hetimet për të identifikuar personat përgjegjës për plagosjen e Erion Vishkulit. Kërkesë për ndërhyrjen e menjëhershme të Prokurorisë së Tiranës ka bërë edhe deputeti i Partisë Demokratike, Belind Këlliçi, pas episodeve të dhunës të raportuara në kryeqytet.

Ndërkohë, zëdhënësja e PD, Floriana Garo, publikoi një video në rrjetet sociale ku pretendon se efektivët e policisë kanë ndaluar disa qytetarë brenda një lokali pa asnjë shkak. Deputeti i PD-së, Gjin Gjoni, u shpreh gjatë një lidhjeje të drejtpërdrejtë në emisionin Review me Greta Topjanën se kjo protestë nuk i përket vetëm Partisë Demokratike. Nga ana e tij, ish-ministri i Jashtëm, Ditmir Bushati, reagoi duke shprehur shqetësimin për përdorimin e mjeteve të ndryshme që shkaktojnë përleshje e rrezik për jetën, ndërsa theksoi se as dhuna policore nuk përbën zgjidhje. Po ashtu, kreu i partisë Shqipëria Bëhet, Adriatik Lapaj, si dhe deputetja e pavarur Mariana Koçeku, dënuan goditjet dhe dhunën e policisë ndaj protestuesve gjatë zhvillimeve në Tiranë.