Artan Hoxha: Rama po e tepron, t’i bëjë llogaritë mirë

Gazetari Artan Hoxha ka komentuar protestat e fundit në Shqipëri dhe qasjen e qeverisë ndaj qytetarëve në rrugë, duke vlerësuar se kryeministri Edi Rama po e kalon çdo masë me mënyrën e trajtimit të protestuesve nga Policia. I ftuar në emisionin televiziv, ai solli në vëmendje zhvillimet në Serbi dhe protestat ndaj presidentit Aleksandar Vuçiç, duke përmendur se edhe në vendin tonë qytetarët bashkohen nga kërkesa për dorëheqjen e kryeministrit.

Sipas gazetarit, fokusi fillestar i protestuesve duhet të jetë te largimi i qeverisë aktuale dhe vendosja e kushteve për një proces të ri politik bashkë me ndryshimet në Kodin Zgjedhor, e jo te emrat e kandidatëve të mundshëm për kryeministër. Hoxha akuzoi ekzekutivin se nuk njeh dialogun dhe se ka ndërmarrë masa të rënda ndaj qytetarëve. Ai bëri thirrje që organet e drejtësisë të hetojnë të gjitha rastet e pretenduara të dhunës policore dhe jo vetëm ato me vëmendje publike.

Në diskutimet rreth ecurisë së protestave, Hoxha tha se pakënaqësia e akumuluar nga korrupsioni dhe lidhja e pretenduar mes politikës dhe krimit i ka nxjerrë njerëzit në shesh, ndërsa shtoi se ulja e përkohshme e pjesëmarrjes nuk nënkupton mbylljen e lëvizjes. Ai paralajmëroi se dështimi i protestës do t'i shtyjë studentët drejt largimit nga vendi ose drejt angazhimeve të paligjshme, duke përmendur gjithashtu se përfshirja e figurave të tjera politike në protestë nuk përbën ndonjë problem.