KEK formon Task Forcë për sigurinë industriale pas humbjes së punëtorëve
Pas humbjes së punëtorëve, KEK-u njofton masa të menjëhershme dhe formimin e një Task Force për sigurinë industriale dhe shëndetin në punë.
Pas humbjes së punëtorëve, Bordi i Drejtorëve dhe menaxhmenti i KEK-ut kanë njoftuar masa të menjëhershme për rritjen e sigurisë industriale dhe mbrojtjen e shëndetit të punëtorëve. Ata kanë shprehur dhimbje dhe kanë përcjellë ngushëllime për familjarët dhe kolegët e viktimave.
Vendimi u mor në një mbledhje të jashtëzakonshme, ku menaxhmenti raportoi për rrethanat e ngjarjes. Në vendngjarje po zhvillohen hetime nga organet kompetente dhe ekspertët e forenzikës, ndërsa shkaqet e plota pritet të përcaktohen përmes procesit hetimor.
Bordi ka kërkuar qartësimin e roleve, përgjegjësive dhe llogaridhënies në proceset e sigurisë në punë. Për këtë qëllim, KEK-u do të krijojë Task Forcën për Sigurinë Industriale dhe Shëndetin në Punë, me përfshirjen e ekspertëve të jashtëm. Task Forca do të rishikojë protokollet, procedurat dhe standardet ekzistuese, duke evidentuar mangësitë dhe duke përcaktuar masa konkreta përmirësimi.
Gjithashtu, KEK-u ka bërë të ditur se vlerësimi i rrezikshmërisë në vendet e punës është kontraktuar gjatë këtij viti dhe është në fazën e zbatimit. Bordi dhe menaxhmenti kanë ritheksuar se siguria dhe shëndeti i punëtorëve janë prioritet absolut, duke theksuar se asnjë objektiv operacional nuk mund të vendoset mbi sigurinë dhe jetën e punonjësve. Informacione për hapat e mëtejshëm priten në ditët në vijim.