Operacioni Anchor godet trafikun e drogës nga Kanadaja në Durrës
Policia finalizon operacionin "Anchor" në Portin e Durrësit, duke sekuestruar rreth 80 kilogramë kanabis të llojit "Gelato" me vlerë rreth 1 milion euro.
DURRËS — Strukturat e Policisë së Durrësit, në bashkëpunim me Prokurorinë, autoritetet doganore dhe strukturat e Kufirit dhe Migracionit, kanë finalizuar operacionin e koduar «Anchor». Gjatë këtij aksioni është goditur një rast i dyshuar i trafikimit ndërkombëtar të lëndës narkotike nga Kanadaja drejt Shqipërisë.
Në ambientet e Portit të Durrësit janë sekuestruar 127 pako që përmbanin afërsisht 80 kilogramë kanabis të llojit «Gelato», me përmbajtje të lartë THC. Sipas autoriteteve, vlera e drogës në treg kap shifrën e rreth 1 milion eurove, ndërsa lënda ishte fshehur brenda një automjeti të porositur për blerje në Kanada. Si rezultat i këtij operacioni, tre persona nga Kosova janë vënë në pranga dhe dy të tjerë janë shpallur në kërkim.