Kapetanović: Krimi nuk njeh kufij, siguria kërkon bashkëpunim

TIRANË — Përfaqësues të institucioneve të sigurisë nga rajoni, Bashkimi Evropian dhe organizata ndërkombëtare janë mbledhur në Tiranë në Konferencën Rajonale të Sigurisë JUMBO 2026, e cila trajton sfidat nga krimi i organizuar te sulmet kibernetike dhe kërcënimet hibride. Sekretari i Përgjithshëm i Këshillit të Bashkëpunimit Rajonal, Amer Kapetanović, kërkoi që bashkëpunimi të mos mbetet vetëm te deklaratat dhe takimet. «Deri në konferencën e ardhshme JUMBO, duhet të jemi në gjendje të tregojmë përmirësime konkrete: një procedurë që funksionon më mirë, një kontakt që mundëson një përgjigje në kohë, apo një mangësi në gatishmëri që është adresuar», deklaroi Kapetanović, duke shtuar se qytetarët duhet të përfitojnë nga këto diskutime.

Në hapjen e këtij organizimi dyditor, ku marrin pjesë më shumë se 150 zyrtarë të lartë dhe ekspertë, u theksua nevoja e shkëmbimit të informacionit për shkak se rrjetet kriminale veprojnë njëkohësisht në disa shtete. Në tryezat e diskutimit janë përfshirë çështje si trafikimi i armëve, kontrabandimi i migrantëve, korrupsioni, përdorimi i dronëve, teknologjitë e reja dhe ndryshimet klimatike. Gjatë sesioneve, pjesëmarrësit do të shqyrtojnë gjithashtu gjetjet paraprake të anketës rajonale SecuriMeter 2026, ndërsa rezultatet e plota do të prezantohen në Beograd.

Në nisjen e punimeve të konferencës morën pjesë ministri i Brendshëm i Shqipërisë, Ervin Demo, përfaqësues të diplomacisë dhe Ministrisë së Brendshme italiane, si dhe të Delegacionit të Bashkimit Evropian. Aktiviteti organizohet nga Këshilli i Bashkëpunimit Rajonal me mbështetjen e Italisë dhe Bashkimit Evropian, në partneritet me Ministrinë e Punëve të Brendshme të Shqipërisë. Në ditën e dytë, të pranishmit do të ndahen në katër grupe tematike për të prodhuar rekomandime praktike mbi gatishmërinë rajonale.