90 familje në Vlorë kërkojnë ndërhyrje te Kabinat e Plazhit të Vjetër

VLORË — Rreth 90 familje të strehuara prej vitesh në Kabinat e Plazhit të Vjetër në Vlorë përballen me kushte të vështira banimi. Godinat sociale janë amortizuar dhe nuk kanë pësuar asnjë ndërhyrje për rikonstruksion që prej vitit 1990. Banorët tregojnë se ndodhen në hapësira thuajse të pabanueshme, të mbushura me lagështi, mure të rrëzuara dhe pa dyer e dritare. Pjesë e këtyre familjeve në nevojë janë të pastrehë, persona me aftësi të kufizuara dhe anëtarë të komuniteteve rom e egjiptian. Për shkak të pamundësisë ekonomike për të përballuar qiratë në qytet, ato detyrohen të qëndrojnë në këto objekte, ndërsa projektet për shembjen dhe strehimin e mëvonshëm kanë mbetur në letër.

Banorët thonë se nuk kanë marrë asnjë zgjidhje nga institucionet përkundër ankesave të tyre. «Kushtet janë shumë të këqija», shprehet një banore, e cila shton se ka frikë nga rrëzimi i mureve, ndërsa një tjetër qytetare thekson mungesën e banjave dhe rrezikun nga kabllot elektrike. Përveç nevojës për mbështetje strehimi, familjet kërkojnë ndihmë për kushtet minimale dhe ushqime, pasi vuajnë nga probleme shëndetësore dhe mungesa e të ardhurave.