Hoxha zbulon detajet mbi hetimin e SPAK që përfshin deputeten Sara Mila

Gazetari Artan Hoxha ka zbardhur detaje nga hetimi që çoi deputeten socialiste të Elbasanit, Sara Mila, në Prokurorinë e Posaçme, duke sqaruar se çështja lidhet me zgjedhjet e përgjithshme të 21 majit dhe dyshimet për deformim të rezultatit zgjedhor në një fshat të Peqinit.

Sipas gazetarit, Prokuroria e Elbasanit kishte nisur fillimisht një hetim për një çështje tjetër, gjatë të cilit u zbuluan komunikime që u vlerësuan si indicie për krim zgjedhor dhe iu deleguan organit të akuzës së posaçme për verifikim të mëtejshëm. Në këtë kontekst, hetuesit po shqyrtojnë mundësinë që deputetja ose persona të tjerë të kenë ushtruar ndikim te votuesit në fshatin Gjocaj pak para zgjedhjeve të përgjithshme.

Gjatë një paraqitjeje televizive në emisionin Now në Euronews Albania, Hoxha tha se në fshatin Gjocaj të Peqinit ishte vërejtur një rritje e ndjeshme e numrit të banorëve që përfitonin nga ndihma ekonomike, ku ky numër rezultonte i trefishuar. Për më tepër, ai kujtoi se gjatë periudhës zgjedhore ishte ngritur një task-forcë e përbashkët mes institucioneve për të parandaluar deformimin e votës, por sipas tij hetimi i tanishëm vjen dy vjet më pas dhe nuk ndryshon dot zhvillimet e kaluara.

«Sara Mila, këto vitet e fundit, është bërë një yll në ngjitje i PS-së. Është bërë kaq e ekspozuar mediatikisht, saqë ka dalë në panele, ka shpalosur idetë e saj dhe madje ka ndryshuar edhe look-un e saj», u shpreh Hoxha gjatë fjalës së tij, duke shtuar se në vitin 2025 ajo nuk ka qenë një figurë e njohur për publikun.