Si po shënohet sivjet Java e dhurimit vullnetar të gjakut?

PRISHTINË — Java e dhurimit vullnetar të gjakut ka nisur më 11 qershor dhe do të vazhdojë deri më 18 qershor në disa qendra të vendit. Ky aksion vjetor shënon Ditën Botërore të Dhuruesit të Gjakut, e cila është më 14 qershor.

Qytetarë të shumtë të moshave të ndryshme i janë përgjigjur thirrjes për solidaritet direkt në sheshin e Prishtinës. Njëri prej tyre u shpreh se, përveç shpëtimit të jetës, dhurimi i tij është një kontribut simbolik edhe për Ditën e Çlirimit të Kosovës.

Ndër dhuruesit ka nga ata që këtë procedurë humane e bëjnë shpesh, për të dhënë kontribut maksimal për pacientët. Njëri prej tyre tregoi se dhuron gjak të paktën dy deri në tri herë në vit, sidomos kur ekipi ndodhet në shesh.

Specialistja e transfuziologjisë, Merita Morina Bujupi, theksoi se motoja e sivjetme është "dhuro gjak, shpëto jetë". Sipas saj, ky aksion ka një rëndësi të madhe, pasi duke dhuruar gjak shpëtohen shumë jetë njerëzish.

Ky aksion nuk do të kufizohet vetëm në Prishtinë, pasi organizimet do të shtrihen edhe në qytete të tjera të vendit deri më 18 qershor. Ky organizim dëshmon se mobilizimi dhe ndërgjegjësimi i qytetarëve për rëndësinë jetike të dhurimit mbeten të lartë.

Burim: Zëri
— Redaksia ZHURMA