IKSHPK vë në funksion metodën për zbulimin e 31 pesticideve

Instituti Kombëtar i Shëndetësisë Publike të Kosovës ka vënë në funksion një metodë të re analitike për përcaktimin e mbetjeve të pesticideve në fruta dhe perime. Sipas njoftimit të institucionit, kjo metodë zbatohet në kuadër të Laboratorit të Pesticideve, i cili vepron pranë Departamentit të Ekologjisë Humane.

Analiza realizohet përmes kromatografisë së gaztë duke përdorur pajisjen e specializuar të lidhur me spektrometrin e masës. Kjo mundëson analizimin e gjithsej 31 pesticideve të ndryshme, ku përfshihen herbicidet, triazinet, pesticidet organoklorike dhe insekticide piretroide.

Kapaciteti aktual i laboratorit është pesë mostra në javë, ndërsa sipas institutit pritet që ky kapacitet të rritet në të ardhmen. Funksionalizimi i kësaj metode zgjeron mundësitë analitike për monitorimin e ushqimit, duke kontribuar drejtpërdrejt në vlerësimin e sigurisë ushqimore dhe mbrojtjen e shëndetit publik.