DSHMS: S’ka mbyllje të ambulancës në Kishnapolë, shërbimi ndërpritet përkohësisht

GJILAN — Drejtoria për Shëndetësi dhe Mirëqenie Sociale në Komunën e Gjilanit ka dhënë sqarime rreth shërbimit ambulantor në Kishnapolë, pas keqkuptimeve të krijuara në opinionin publik. Mimoza Kadriu Qerimi thotë se nuk bëhet fjalë për vendim të mbylljes së ambulancës, por për ndërprerje të përkohshme të shërbimit deri në rekrutimin e stafit të ri përmes një konkursi që pritet të shpallet së shpejti.

Sipas Drejtoreshës së DSHMS-së, gjatë kësaj periudhe janë vënë në dispozicion numrat kontaktues të urgjencës dhe të patronazhit, ndërsa qytetarët vazhdojnë të kenë qasje në shërbime shëndetësore. Bazuar në analizën e raporteve gjashtëmujore dhe rekomandimin e Komitetit për Cilësi në kuadër të QKMF-së, në këtë ambulantë është konstatuar numër shumë i ulët i shërbimeve të ofruara. Për shkak të kësaj situate dhe në prag të sezonit të gripit, personeli është angazhuar përkohësisht në Qendrën Kryesore të Mjekësisë Familiare në qytetin e Gjilanit për një organizim më efikas.