Haxhiu: Sakrifica e Idriz Rrecajt s’do të harrohet kurrë

Kryetarja e Kuvendit, Albulena Haxhiu, ka bërë homazhe në nderim të Idriz Rrecajt, eshtrat e të cilit janë kthyer në vendlindje për t'u rivarrosur pranë familjes së tij, në Skenderaj. Përmes një postimi, ajo ka kujtuar se Rrecaj ishte pjesë e “Grupit të Intelektualëve”, një grup atdhetarësh që angazhoheshin për vendin dhe lirinë e Kosovës. Ajo ka theksuar se anëtarët e këtij grupi u shënjestruan nga forcat serbe, me qëllim të zhdukjes së tyre dhe të gjurmëve që lanë pas. Haxhiu ka vlerësuar se gjetja dhe rivarrimi i tij përbëjnë një hap drejt drejtësisë dhe një ngushëllim për familjen, e cila priti për vite të tëra. Ajo ka theksuar se kërkimi për personat e zhdukur me dhunë duhet të vazhdojë deri në zbardhjen e së vërtetës, pasi dhimbja mbetet e madhe për familjet që ende presin përgjigje.