Pentagoni përgjigjet për propozimin e Kurtit rreth Bondsteelit
Selia qendrore e mbrojtjes në SHBA jep një përgjigje të shkurtër pas kërkesës për shndërrimin e kampit ushtarak në bazë të përhershme.
Redaksia ZHURMA · · 1 min lexim
Ideja e kryeministrit Albin Kurti për ta kthyer Kampin Bondsteel në një bazë të përhershme ushtarake amerikane ditëve të fundit u shtyu përpara edhe nga senatori Dick Durbin, i cili deklaroi se ajo duhet të shqyrtohet seriozisht. Gjatë vizitës në Prishtinë dhe takimit të mbajtur më 12 tetor, kreu i ekzekutivit i njohu senatorët me një hartë të Kosovës dhe rreziqet e sigurisë përreth, ndërsa Durbin vlerësoi se prania e KFOR-it e ka kryer mirë detyrën për të mbajtur paqen dhe sigurinë.
Në lidhje me këtë çështje, Pentagoni është deklaruar përmes një përgjigjeje të shkurtër nga selia qendrore e mbrojtjes amerikane. «Nuk kemi asgjë për të njoftuar në këtë kohë», thuhet në përgjigjen e tij. Kërkesa e Kurtit për këtë status të përhershëm të kampit që ndodhet pranë Ferizajt është theksuar edhe më herët gjatë vizitës së tij në Shtetet e Bashkuara të Amerikës në shtator, si dhe në takimin me kongresistin George Latimer. Ndërkohë, Ushtria amerikane ka njoftuar se trupat e Gardës Kombëtare të Floridës do të zëvendësohen me ushtarë nga Regjimenti i 2-të i Kalorësisë nga Gjermania dhe njësi mbështetëse.
