Gostivari mbetet pa ujë të pijshëm — tre persona nën masa sigurie

GOSTIVARI — Ekipet profesionale të Ndërmarrjes Publike Komunale (NPK) të Gostivarit dhe të NP "Ujësjellësi dhe Kanalizimi" – Shkup po hartojnë një plan për rikthimin në funksion të ujësjellësit, pas krizës që ka ndalur furnizimin me ujë të pijshëm në qytet. Plani parashikon kontrolle të vazhdueshme të cilësisë së ujit në disa pika publike.

Ministri i Shëndetësisë, Sasho Klekovski, thekson se furnizimi do të rikthehet vetëm pasi të konfirmohet se uji është plotësisht i sigurt për përdorim. Ministria ka kërkuar që Qendra për Shëndet Publik të dorëzojë të gjitha mostrat e ujit të marra gjatë vitit, me datat dhe lokacionet përkatëse, për një analizë të plotë. Klekovski tha se pyetja është nëse NPK e ka kryer detyrimin ligjor për cilësinë e ujit, ndërsa kontrollet vjetore të Qendrës për Shëndet Publik-Tetovë kanë qenë me numër të kufizuar mostrash.

Kryeministri Hristijan Mickoski tha se prioriteti i qeverisë është sigurimi i ujit teknik për banorët e Gostivarit, e më pas edhe furnizimi me ujë të pijshëm për amvisëri. Ai theksoi se institucionet shtetërore po veprojnë pas periudhës së neglizhencës që kishte komuna. Sipas Mickoskit, deri më tani janë identifikuar tre persona si përgjegjës, ndaj të cilëve janë caktuar tashmë masa sigurie, ndërsa për pjesën tjetër të çështjes po vepron Prokuroria.

Mickoski shtoi se institucionet kanë reaguar "në kohën më të shpejtë të mundshme". Autoritetet u bëjnë thirrje qytetarëve që të ndjekin rekomandimet e institucioneve kompetente derisa të konfirmohet siguria e ujit. Deri atëherë, Gostivari mbetet pa ujë të pijshëm nga rrjeti publik.

Burim: TV21
— Redaksia ZHURMA