Andonovska: Mbi 60 mijë qytetarë janë paraqitur për vaksinim kundër gripit

Mbi 60.000 qytetarë janë paraqitur për të marrë vaksinën kundër gripit sezonal përmes faqes zyrtare të Ministrisë së Shëndetësisë, vakcinacija.mk. Njoftimin e ka bërë të ditur drejtoresha e Institutit të Shëndetit Publik, Marija Andonovska, sipas së cilës procesi i vaksinimit do të zhvillohet në qendrat e shëndetit publik, njësitë e tyre rajonale dhe në disa qendra shëndetësore sipas termineve të caktuara.

Procesi i aplikimit kërkon nga secili qytetar i interesuar që të plotësojë të dhënat personalisht në platformën online dhe të presë njoftimin për kohën dhe pikën e vaksinimit. Ky sistem me termine paraprake zbatohet për të gjithë banorët që kërkojnë të vaksinohen në territorin e shtetit.

Lidhur me rrjedhën e aplikimeve, drejtoresha e ISHP-së, Marija Andonovska, tha për mediat se numri prej mbi 60.000 të paraqiturve është afërsisht në nivelin e mesatares së viteve të mëparshme. Ajo spjegoi se pritet rritje e mëtejshme e kësaj shifre, por e cilësoi interesin aktual të ngjashëm me atë të periudhave të kaluara. Sipas saj, personat me përparësi për imunizim janë ata mbi 65 vjeç, pacientët me sëmundje kronike, fëmijët nga gjashtë muaj deri në pesë vjeç, gratë shtatzëna si dhe punonjësit shëndetësorë.

Andonovska sqaroi se virusi i gripit mund të rëndojë gjendjen e personave të moshuar apo të sëmurëve kronikë, duke sjellë komplikime, shtrime në spital apo rreziqe të tjera shëndetësore për shkak të përgjigjes më të dobët imunitare. Për fëmijët e vegjël, ajo tha se sistemi i tyre imunitar nuk është i zhvilluar mjaftueshëm për luftimin e virozave, prandaj imunizimi ndihmon në uljen e komplikimeve. Për pjesën tjetër të popullatës, drejtoresha apeloi për zbatimin e masave të përgjithshme mbrojtëse, si larja e duarve, përdorimi i maskës, shmangia e ambienteve të mbyllura me shumë njerëz, ajrosja me përshtatje temperature dhe ushqyerja e shëndetshme.

«Qytetarët kanë mundësi të paraqiten në faqen e Ministrisë së Shëndetësisë, vakcinacija.mk, të vendosin të dhënat e tyre dhe të presin të marrin një termin, ku do të informohen se kur dhe në cilën pikë vaksinimi duhet të vijnë për tu vaksinuar. Deri më tani, jemi të kënaqur me interesimin e qytetarëve që po shfaqin interes. Deri më tani janë paraqitur mbi 60.000 qytetarë që dëshirojnë ta marrin vaksinën. Kjo është afërsisht mesatarja e viteve të mëparshme. Presim që numri të mund të rritet, por, njejtë si në vitet e kaluara, interesimi është pak a shumë i ngjashëm», deklaroi Marija Andonovska.

«Pikërisht vaksina është kundër kësaj, të mos shfaqen komplikime, por jo çdoherë 100% do ta parandalojë gripin. Kjo do të thotë se ju nëse e merrni vaksinen nuk do të thotë se nuk do të sëmureni nga gripi, por nëse sëmureni ajo dë të jetë me simptoma shumë më të lehta, që është më e rëndësishme dhe gjithashtu nuk do të ju shfaqen komplikime. Për këto arsye rekomandohet vaksinimi», shtoi ajo.