Rritet numri i goditjeve në tru, pacientja më e re një vajzë 16-vjeçare

Mjekët në Klinikën e Neurologjisë në Shkup po regjistrojnë një numër në rritje të rasteve me goditje në tru, ndërsa pacientja më e re që është trajtuar atje rreth një muaj e gjysmë më parë është një vajzë 16-vjeçare.

Sipas mjekëve, shqetësues është fakti se kjo sëmundje po prek gjithnjë e më shumë moshate reja. Ata paralajmërojnë se 30 deri në 40 për qind e pacientëve që pësojnë goditje në tru mbeten me pasoja të përhershme shëndetësore, ku përfshihen paraliza, vështirësitë në të folur dhe paaftësia e përgjithshme fizike.

Drejtori i Klinikës së Neurologjisë, Jovan Bozhinovski, njoftoi se faktorët e rrezikut ndahen në dy grupe kryesore: faktori gjenetik që nuk mund të ndryshohet, si dhe faktorët e ndryshueshëm si tensioni i lartë i gjakut, diabeti, kolesteroli i lartë, stili jo i shëndetshëm i jetesës, stresi, konsumimi i alkoolit dhe përdorimi i substancave psikotrope.

Me rastin e Ditës Botërore të Goditjes në Tru, Klinika e Neurologjisë do të organizojë nesër një ditë të hapur nga ora 11:00 deri në 13:00, ku do të kryhen ekzaminime falas me Doppler të arterieve karotide pa kufizim në numrin e qytetarëve. Gjithashtu, ekipet mjekësore po realizojnë matje parandaluese falas të tensionit, sheqerit në gjak, kolesterolit dhe vlerësime të rrezikut për goditje në tru.

Bozhinovski theksoi rëndësinë e reagimit të shpejtë mjekësor për shpëtimin e jetës së pacientëve. “Sëmundja trajtohet me sukses vetëm nëse veprojmë shpejt, dhe për këtë arsye motoja jonë është se çdo minutë ka rëndësi, sepse sa më shpejt të vijë një pacient në klinikën tonë, aq më shpejt ai ose ajo mund të shpëtohet dhe më pas të çlirohet nga paaftësia, sepse e dimë që sëmundja është ndër sëmundjet e para për sa i përket paaftësisë dhe vdekshmërisë”, tha Bozhinovski.