Gonxhja lidhur me kullat e veriut: Hapim skemë grantesh prej 30 milionë lekësh

Ministria e Turizmit, Kulturës dhe Sportit do të hapë një skemë grantesh prej 30 milionë lekësh për promovimin e trashëgimisë kulturore të kullave në veri, në kuadër të programit “Trashëgimia Kulturore dhe Muzetë” për vitin 2027. Ministri Blendi Gonxhja njoftoi gjithashtu se është mbyllur inventarizimi i 650 kullave dhe janë hartuar projekte restaurimi për 28 kulla monument kulture.

Procesi i rijetëzimit të kullave tradicionale po kryhet në bashkëpunim me organizatën GIZ dhe Fakultetin e Arkitekturës dhe Urbanistikës. Nisma mbulon qarqet Dibër, Shkodër, Lezhë dhe Kukës, me synim zgjerimin e ofertës së turizmit kulturor e malor, nxitjen e sipërmarrjes lokale dhe krijimin e mundësive për të rinjtë në këto komunitete.

Plani për vitin 2027 përfshin edhe reformën në strukturat e trashëgimisë përmes rritjes së shpenzimeve korrente. Ministri Gonxhja bëri të ditur se vazhdon rritja e pagave e nisur në vitin 2026 për punonjësit që punojnë në terrene të vështira dhe lartësi. Nga ky vendim përfitojnë 93 punonjës: 62 restauratorë marrin një shtesë prej 15 mijë lekësh në muaj, ndërsa 31 punëtorë restaurimi marrin 20 mijë lekë shtesë në muaj.

Qeveria ka miratuar gjithashtu ngritjen e një me strukture përgjegjëse për inspektimin, konstatimin dhe ndëshkimin e shkeljeve, si ndërhyrjet e paligjshme apo gërmimet e paautorizuara. Të ardhurat nga gjobat do të derdhen në Fondin Kombëtar të Kujdesit për Trashëgiminë Kulturore. Po ashtu, Muzeut Kombëtar të Përgjimeve “Shtëpia me Gjethe” do t'i shtohen pesë pozicione pune pas rritjes prej 13% të numrit të vizitorëve.

Gjatë vitit 2027 parashikohet mbështetja e nismave si “Java e Muzeve”, pjesëmarrja në Bienalen e Arkitekturës në Venecia dhe në Panairin Mesdhetar të Turizmit Arkeologjik në Paestum të Italisë, përveç financimit të programeve artizanale.