Indeksi i besimit të konsumatorëve në Zvicër bie në minus 44.9 pikë

Indeksi i besimit të konsumatorëve në Zvicër ka shënuar rënie të ndjeshme gjatë muajit tetor 2026, duke zbritur në minus 44.9 pikë, sipas të dhënave të publikuara nga Sekretariati Shtetëror për Ekonomi i Zvicrës. Ky zhvillim prek drejtpërdrejt familjet shqiptare që jetojnë dhe punojnë në këtë shtet, të cilat përballen me pasiguri financiare dhe mundësi më të pakta për shpenzime.

Ky tregues reflekton nivelin më të ulët të regjistruar në pothuajse tre vjet, duke iu afruar vlerës së nëntorit 2023, kur kishte rënë në minus 48 pikë. Përkeqësimi vërehet qartë edhe në krahasim me muajin shtator, kur indeksi ishte minus 36.5 pikë, si dhe me minus 36.9 pikët e të njëjtës periudhë të vitit paraprak.

Sipas të dhënave të SECO-s, situata financiare e kaluar ka shënuar rënie nga minus 40.7 pikë në tetorin e vitit 2025 në minus 53.8 pikë gjatë tetorit 2026. Një rënie e ngjashme është vërejtur edhe te pritjet financiare në të ardhmen, të cilat kanë arritur në minus 44.7 pikë, krahasuar me minus 32.2 pikë më parë. Ndërkohë, gatishmëria për blerje të mëdha, si pajisje shtëpiake apo produkte të tjera me vlerë të lartë, ka zbritur nga minus 25.7 në minus 32.7 pikë, ndërsa pritjet për zhvillimin e përgjithshëm ekonomik kanë shënuar një përmirësim të lehtë prej 0.9 pikësh duke arritur në minus 48.2 pikë, bëjnë të ditur burimet.

Ankesa online e përmuajshme e realizuar nga SECO ka përfshirë 2,717 persona mbi moshën 16-vjeçare, të cilët janë përgjigjur në gjuhët gjermane, frënge ose italiane, duke dëshmuar pesimizmin e shtuar të qytetarëve për gjendjen e tyre ekonomike.