Gjykata në Itali cakton arrest me burg për Eduart Xhanin

Gjykata e Breshias në Itali ka caktuar masën e sigurisë «arrest me burg» për 21-vjeçarin Eduart Xhani, i cili akuzohet për vrasjen e nënës së tij, 39-vjeçares Meleqe Lusha. I riu nuk ndodhet në qeli, por është i shtruar në Spitalin Civil të Breshias nën mbikëqyrjen e policisë, për shkak të rrezikut të veprimeve vetëdëmtuese. Ngjarja ndodhi më 3 nëntor në Chiari, ku pas verifikimeve trupi i pajetë u gjet në banesë, ndërsa autopsia u krye të premten, më 6 nëntor.

Gjatë marrjes në pyetje nga gjyqtari i hetimeve paraprake, Mauroernesto Macca, Xhani ka rrëfyer se mbrëmjen e 2 nëntorit kishte menduar t’i jepte fund jetës, pasi nuk kishte arritur të gjente vendin e vet në një botë që e konsideronte «të padrejtë dhe të keqe». Sipas dëshmisë, pasi tentativa për vetëvrasje nuk kishte përfunduar siç kishte menduar, ai dyshohet se kishte goditur nënën me thikë rreth dhjetë herë në kraharor dhe bark. Pas krimit, ai ishte larguar me automjetin e tij tip Audi A1 dhe rreth orës 07:00 të mëngjesit ishte dorëzuar në kazermën e karabinierëve në Kremona.

Sipas informacioneve nga mediat italiane, mes tyre nuk kishte pasur konflikte apo tensione të mëparshme. Eduart Xhani kishte punuar më herët si murator dhe në një restorant ushqimi të shpejtë në Rovato, ndërsa ishte zhvendosur në Chiari bashkë me nënën pas ndarjes së saj nga babai i të riut. Gjendja e tij psikologjike do tregtohet në ekspertiza gjatë procesit gjyqësor, ndërsa hetimet vijojnë.