Gjykata Federale e Zvicrës konfirmon humbjen e lejes C për një shtetas kosovar

Gjykata Federale e Zvicrës ka rrëzuar ankesën e një shtetasi nga Kosova, duke vërtetuar se leja e tij e përhershme e qëndrimit C kishte skaduar në mënyrë automatike. Sipas vendimit gjyqësor, ai hyri në Zvicër më 11 tetor 1998 dhe e fitoi lejen C më 30 korrik 2008 pas martesës me një shtetase kosovare, ndërsa divorci i tyre u mbyll më 16 tetor 2019 pas lindjes së tre fëmijëve.

Shkak u bë periudha nga 28 marsi 2022 deri më 17 tetor 2023, kur autoritetet nuk arritën ta gjenin dhe ai nuk kishte adresë të regjistruar apo dëshmi qëndrimi. Më 28 shkurt 2022 u dëbua nga një garazh në Granges-Paccot, dhe më 28 mars 2022 nga banesa në Friburg, ndërsa ish-bashkëshortja deklaroi më 20 prill 2022 se nuk kishte më kontakte me të. Më 28 shtator 2022 emri iu hoq nga regjistri i banorëve, kurse policia e kërkonte edhe për mashtrim, falsifikim, pastrim parash e shkelje të kredive të pandemisë COVID-19. Ai u paraqit vullnetarisht në polici më 29 mars 2023 dhe u arrestua më 17 tetor 2023 në një kantier në La Verrerie për të vuajtur dënimet e mëparshme.

Gjatë qëndrimit në Zvicër, ai ishte dënuar pesë herë mes viteve 2009 dhe 2016 për punësim të huajve pa leje, çka solli një paralajmërim nga autoritetet e Friburgut më 4 gusht 2016. Ai u dënuar sërish për të njëjtën vepër, si dhe për armë në nëntor 2018 dhe fyerje në janar 2019. Më 2 prill 2020 u dënua me 24 muaj burgim, prej të cilëve 12 efektivë dhe 12 me kusht për pesë vjet, për lëndim të lehtë ndaj bashkëshortes, dhunë ndaj fëmijëve, kërcënime, shkelje të trafikut dhe sigurime shoqërore. Autoritetet e paralajmëruan përfundimisht më 20 shtator 2021 se borxhet apo veprat e reja do sillnin dëbim.