Itali: 22-vjeçari shqiptar dërgohet në paraburgim për kokainën

Autoriteti gjyqësor ka urdhëruar masën e paraburgimit për 22-vjeçarin shqiptar që u arrestua në Itali, pasi gjatë një kontrolli në autostradën A4 iu gjetën 5.860 gramë kokainë. Sipas njoftimit të Policisë së Shtetit, i riu me banim në rajonin e Toskanës po udhëtonte i vetëm në drejtim të Milanos kur u ndalua nga patrulla policore pranë komunës së Sonës.

Gjatë verifikimeve në automjet, zyrtarët zbuluan pesë pako të mbështjella me shirit ngjitës dhe të shënuara me logon e një prodhuesi të njohur veturash, të fshehura në hapësirën e dedikuar për airbag-un e pasagjerit. Analizat e kryera nga Policia Shkencore e Shtabit të Policisë së Veronës konfirmuan se substanca e sekuestruar ishte kokainë. Pas vlerësimit të arrestimit, i dyshuari u dërgua në burgun e Montorios, ndërsa autoritetet theksuan se përgjegjësia penale vërtetohet vetëm pas një vendimi penal të formës së prerë.