Eduart Xhani u dorëzua te karabinierët pas vrasjes së nënës së tij në Itali

Eduart Xhani, 21 vjeç, u paraqit vetë te karabinierët e Kremonës pasi akuzohet se vrau me thikë nënën e tij 39-vjeçare, Meleqe Lusha, natën e 2 nëntorit në banesën e tyre në Chiari të Brescias. I riu u arrestua nga autoritetet dhe u dërgua në burgun Canton Mombello në Brescia.

I lindur në San Bonifacio të provincës së Veronës, Xhani ishte rritur në Itali nga nëna e tij, me mbështetjen e katër dajeve, vëllezërit e Meleqes. Në muajin gusht, ai dhe e ëma ishin zhvendosur në një apartament të ri. Ai kishte ndjekur studimet në institutin Einaudi me orientim drejt turizmit, gjatë të cilit kreu praktikë në një agjenci imobiliare në Chiari. Më pas punoi me dajet në ndërtim para se të punësohej në një fabrikë të zonës.

Sipas hetuesve italianë, 21-vjeçari e goditi nënën e tij rreth 10 herë me thikë në shtëpinë e tyre. Pas ngjarjes, ai u largua me makinë, por pas disa orësh u dorëzua vetë te karabinierët e Kremonës, ku deklaroi se kishte kryer vrasjen dhe tregoi vendndodhjen e trupit. Autoritetet italiane bënë të ditur se i riu nuk ishte në gjendje të shpjegonte arsyen e veprimit dhe se nuk kishte shfaqur asnjë pakënaqësi ndaj nënës së tij apo konflikte të njohura me ligjin.

Për të përcaktuar gjendjen e tij, pritet që 21-vjeçari t'i nënshtrohet një vlerësimi psikiatrik, meqë autoritetet italiane dyshojnë se ai mund të ketë probleme të shëndetit mendor. Ndërkohë, pronari i një dyqani në qendër të qytetit njoftoi se do të organizojë një mbledhje fondesh në ndihmë të familjes Lusha.

Ngjarja ka tronditur fqinjët dhe njohësit e familjes në Chiari. Ish-punëdhënësi i tij, Denis Beqiri, njëkohësisht president i shoqatës shqiptare në zonë, e përshkroi atë si një të ri të përpiktë, buzagaz dhe të përgjegjshëm. Një ish-fqinj u shpreh se ai ka qenë gjithmonë një djalë i mirë që e shihte shpesh duke ecur drejt stacionit për të shkuar në punë. Një tjetër fqinj e përshkroi Meleqe Lushën si një grua shumë të ëmbël e të sjellshme, njësoj si djali i saj.