Gjykata e Fierit lë në burg tre të dyshuar për tokën në Povelçë

Pas një seance maratonë që zgjati rreth 7 orë, Gjykata e Fierit ka vendosur masën e sigurisë «arrest me burg» për Arben Vojën, Dilaver Shytin dhe Anila Haxhiun. Të dyshuarit janë nën hetim për tjetërsimin e pronës shtetërore në zonën e Povelçës, ndërsa për Fjorelo Bidën gjykata ka caktuar tre masa me karakter ndalues.

Hetimet lidhen me kalimin e paligjshëm të 44 mijë metrave katrorë tokë shtetërore në pronësi private. Sipas dyshimeve të hetuesve, ky truall ishte planifikuar të përdorej për ndërtimin e një parku fotovoltaik, ndërsa të katër personat akuzohen për mashtrim, falsifikim dokumentesh, shpërdorim detyre dhe pastrim të produkteve të veprës penale.