Gjithsej 242 raste me fruth, 18 të reja brenda një javë

Gjatë javës së fundit janë shënuar 18 raste të reja me fruth, duke çuar në 242 numrin e përgjithshëm të të prekurve që nga muaji prill, sipas të dhënave të publikuara nga Instituti Kombëtar i Shëndetësisë Publike. Numri i mostrave për të konfirmuar infeksionin është shtuar gjatë kësaj periudhe gjashtëmujore në këtë institucion shëndetësor.

Sipas specialistit të shëndetit publik, Faik Hoti, në përditësimin e fundit të Institutit Kombëtar janë regjistruar 242 raste të fruthit të cilat i takojnë periudhës nga 16 prilli deri me 26 tetor. Hoti ka deklaruar se çdo javë po regjistrohen raste të reja të kësaj sëmundjeje kryesisht te fëmijët e pavaksinuar. Ai ka shtuar se në kuptimin e shifrave të përgjithshme situata është e kontrollueshme dhe se ka angazhime shtesë për vaksinim të rregullt, por e marrin shumë seriozisht sepse fruthi është sëmundje me komplikime serioze. Në Prishtinë gjatë gjashtë muajve të fundit janë konfirmuar 83 raste, 58 në Fushë-Kosovë e 25 në Ferizaj, ndërsa grupmosha më e prekur është 12 deri në 24 muaj, në 93 raste.

Pas shfaqjes së rasteve të reja, pacientët që kanë nevojë për trajtim nga fruthi po vazhdojnë të hospitalizohen në Klinikën Infektive. Infektologu Lirim Tafilaj ka theksuar se momentalisht në këtë klinikë janë duke u trajtuar rreth 19 pacientë të konfirmuar me fruth, ndërsa disa të tjerë janë në pritje të rezultateve si të dyshimtë për morbillë, para se të vijnë konfirmimet zyrtare për rezultatet e tyre. Sipas tij, ky numër lëviz kohë pas kohe në bazë të vizitave ambulantore apo për pacientët që kërkojnë trajtim, ndërsa pacientët po trajtohen në gjendje kryesisht stabile.