Arrestohet 57-vjeçari shqiptar pasi zbulohet plantacion kanabisi në Itali

Një aktivitet i përmasave të mëdha të kultivimit dhe përpunimit të kanabisit është zbuluar në ambientet e një ish-kompleksi industrial në zonën e Altedos, pranë Bolonjës. Gjatë kontrollit, efektivët zbuluan bimë kanabisi në fazë rritjeje, lëndë që po thahej dhe sasi të përgatitura për shpërndarje, ndërsa autoritetet sekuestruan një sasi të konsiderueshme lënde narkotike që dyshohet se i afrohet një toni. Në ambientet e kompleksit ishte ngritur edhe një kamp i improvizuar me çadra dhe pajisje për veprimtarinë e paligjshme.

Në momentin e ndërhyrjes nga karabinierët, tre persona po merreshin me përpunimin e lëndës narkotike, ku dy prej tyre arritën të largoheshin dhe janë shpallur në kërkim, ndërsa i treti, një shtetas shqiptar 57-vjeçar, u arrestua në flagrancë. Përveç tij, gjashtë shtetas të tjerë shqiptarë të moshave 51 deri në 65 vjeç u vunë nën hetim në gjendje të lirë për përfshirje të dyshuar në këtë aktivitet kriminal. Hetimet dhe kontrollet vijojnë për përcaktimin e sasisë përfundimtare të drogës, ndërsa janë nisur procedurat për shkatërrimin e lëndës dhe çmontimin e plotë të plantacionit.