Ethet e Nilit Perëndimor zhvendosen në Shkup e Veles

SHKUP — Ethet e Nilit Perëndimor kanë pësuar një zhvendosje gjeografike në Maqedoninë e Veriut, duke u përqendruar në rajonin e Shkupit dhe në Veles. Ky ndryshim vjen pas vitit të kaluar, kur pothuajse të gjitha rastet e regjistruara ishin në pjesën jugore të vendit.

Ministri i Shëndetësisë, Sasho Klekovski, deklaroi se autoritetet kanë ndërhyrë me spërkatje të jashtëzakonshme në një rreze prej 200 metrash rreth shtëpive të pacientëve. Në Draçevë, ku janë konfirmuar pesë raste, është kryer spërkatje nga toka, e cila vlerësohet si më efikase se ajo ajrore.

Sipas ministrit, shumica e komunave e kanë respektuar planin e spërkatjes kundër mushkonjave. Ai u bëri thirrje qytetarëve për mbrojtje personale dhe të kujdesen për eliminimin e ujit të ndenjur nëpër oborre. Ky virus është i pranishëm prej vitesh, ndërsa kulmi i rasteve ishte shënuar në vitin 2019.

Ky infeksion viral transmetohet përmes pickimit të mushkonjës së infektuar, ndërsa grupet më të rrezikuara janë personat mbi 60 vjeç dhe ata me sëmundje kronike. Ndihma mjekësore duhet kërkuar menjëherë nëse shfaqen simptoma si temperaturë e lartë, dhimbje koke apo dobësi trupore.

Pasi nuk ekziston një bar specifik antiviral, trajtimi synon vetëm lehtësimin e simptomave me pushim dhe konsum lëngjesh. Si masë parandaluese, mjekët rekomandojnë vendosjen e rrjetave mbrojtëse në dritare dhe përdorimin e repelentëve gjatë qëndrimit në ambiente të jashtme.

Burim: Portalb
— Redaksia ZHURMA