Pse rriten eksportet shqiptare me 13.6%?

— Shkëmbimet tregtare të Shqipërisë me jashtë kanë shënuar një rritje të ndjeshme gjatë muajit Qershor 2026. Sipas raportit të fundit zyrtar të Institutit të Statistikave (INSTAT), eksportet e mallrave arritën vlerën e 35,4 miliardë lekëve, duke u zgjeruar me 13,6% në krahasim me të njëjtën periudhë të një viti më parë.

Një ecuri pozitive u vu re edhe në raport me muajin paraardhës (Maj 2026), me një rritje prej 8,3%. Nga ana tjetër, edhe importet e mallrave kanë vijuar kurbën rritëse, duke kapur vlerën e 83,5 miliardë lekëve (një rritje vjetore prej 9,1%).

Për shkak të hendekut të madh mes blerjeve dhe shitjeve jashtë vendit, deficiti tregtar i këtij muaji u fiksua në 48,0 miliardë lekë, duke u zgjeruar me 6,1% në terma vjetorë, por duke pësuar një rënie të lehtë prej 0,4% krahasuar me Majin 2026.

Energjia dhe materialet e ndërtimit udhëheqin eksportet. Sipas strukturës së shkëmbimeve, sektori i energjisë dhe ai i industrisë së rëndë kanë qenë motorët kryesorë që shtynë përpara shitjet shqiptare jashtë kufijve.

Në analizën e INSTAT, ndikimi i grupeve kryesore në rritjen e eksporteve specifikohet si më poshtë: Pozitivisht kanë ndikuar grupet minerale, lëndë djegëse, energji elektrike’ me +5,7 pikë përqindje, ‘Materiale ndërtimi dhe metale’ me +3,6 pikë përqindje, dhe ‘Makineri, pajisje dhe pjesë këmbimi’ me +3,3 pikë përqindje.

Në krahun e kundërt, performancë negative regjistroi sërish sektori i manifakturës tradicionale, ku grupi “Tekstile dhe këpucë” uli eksportet e përgjithshme me -1,1 pikë përqindje, i pasuar nga “Prodhime druri/letre” dhe “Lëkurë dhe artikujt prej tyre” me nga -0,2 pikë përqindje secili.

Sa u përket importeve, rritja prej 9,1% u diktua sërish nga blerjet e lëndëve djegëse dhe energjisë (+2,3 pikë përqindje), si dhe nga grupet “Ushqime, pije, duhan” dhe “Produkte kimike/plastike”, të cilat kontribuan me nga +2,2 pikë përqindje secili.

Italia dhe Kosova partnerët kryesorë Gjeografia e tregtisë së jashtme tregon një konsolidim të raporteve me partnerët tradicionalë, por edhe zhvillime rajonale. Italia mbetet partneri kryesor i vendit, ku eksportet u rritën me 7,6% dhe importet nga ky shtet kërcyen me 24,9%.

Një rritje e fuqishme e eksporteve u regjistrua edhe me Kosovën (38,5%). Ndërkohë, rënien më të madhe të shitjeve Shqipëria e pësoi me Gjermaninë (-12,8%) dhe Maqedoninë e Veriut (-13,0%).

Varësia e ekonomisë shqiptare nga blloku evropian mbetet tejet e lartë, si në shitje ashtu edhe në blerje. “Shkëmbimet tregtare me vendet e BE-së zënë 58,4% të gjithë tregtisë. Në Qershor 2026, eksportet drejt vendeve të BE-së zënë 69,9% të eksporteve gjithsej dhe importet nga vendet e BE-së zënë 53,6% të importeve gjithsej.”, theksohet në raportin e INSTAT.

Të dhënat administrative, të cilat INSTAT i siguron nga Drejtoria e Përgjithshme e Doganave, konfirmojnë se shkalla e mbulimit të importeve nga eksportet për muajin qershor u fiksua në 42,5%, duke shënuar një përmirësim në krahasim me mesataren e vitit të kaluar (39,0%), çka tregon një rritje graduale të kapaciteteve shitëse të vendit.

Nëse doni të jeni i pari për t'u informuar mbi lajme ekskluzive, regjistrohuni më poshtë.

Burim: Gazeta Tema
— Redaksia ZHURMA