Eglant Koçi dyshohet se u vra dhe u gropos nga shoku i tij i ngushtë
Pse një konflikt për kriptovalutat dhe paratë me fajde çoi në vrasjen e Eglant Koçit?
TIRANË — Policia e Shtetit dyshon se 34-vjeçari Eglant Koçi, i cili rezulton i zhdukur që prej datës 4 qershor, është vrarë dhe më pas është groposur në një zonë të izoluar. Kërkimet intensive për gjetjen e trupit të tij dhe kapjen e autorit të dyshuar kanë përfshirë edhe forca të posaçme nga Kosova.
Dyshimet kryesore të grupit hetimor rëndojnë mbi shokun e tij të ngushtë, Armand Shakaj, i cili tashmë është shpallur në kërkim. Gjatë kontrolleve, policia ka sekuestruar automjetin e tij të tipit Porsche. Brenda këtij mjeti u gjetën vegla pune, ku mes tyre spikaste një lopatë me mbetje balte.
Ky detaj kyç ka përforcuar pistën se trupi i viktimës mund të jetë fshehur në ndonjë zonë malore. Sipas drejtorit të Policisë së Tiranës, Oliger Torba, operacionet e kërkimit janë përqendruar kryesisht në disa zona specifike midis Tiranës dhe Elbasanit, ku po kontrollohet me qen gjurmues.
Hetuesit dyshojnë se trupi i pajetë i 34-vjeçarit ka qëndruar për më shumë se 24 orë brenda makinës së autorit të dyshuar. Më pas, Armand Shakaj ka aluduar se automjeti Porsche kishte pësuar një defekt teknik dhe ka thirrur një karrotrec për ta transportuar atë.
Makina u dërgua deri në zonën e Ibës, një territor ky që nuk mbulohet nga kamerat e sigurisë rrugore apo ato private. Nga kjo pikë, autori i dyshuar dyshohet se ka kryer fshehjen e trupit dhe është larguar në drejtim të paditur, duke mos lënë asnjë gjurmë të dukshme për grupin hetimor.
Motivi i ngjarjes së rëndë dyshohet të jetë një konflikt i ashpër për aktivitete të paligjshme. Hetuesit po verifikojnë përplasjet mes dy shokëve për transaksionet e kriptovalutave ose monedhave virtuale. Po ashtu, po hetohet edhe pista e mosshlyerjes së një shume të konsiderueshme parash të dhëna me fajde.
Sipas të dhënave, Armand Shakaj dyshohet se jepte para me fajde, kurse Eglant Koçi kishte ndërmjetësuar që këto shuma t'u jepeshin personave të tretë. Pasi këta të fundit nuk i kthyen paratë, Shakaj dyshohet se ka bërë përgjegjës dhe ka sulmuar shokun e tij të ngushtë.
Burim: BalkanWeb
— Redaksia ZHURMA