Policia e Shtetit: Kujdes nga SMS-të mashtruese në emër të bankave

Policia e Shtetit ka ngritur shqetësimin për qarkullimin e disa mesazheve telefonike mashtruese që dërgohen nga numra të ndryshëm telefoni në emër të institucioneve bankare, me qëllim vjedhjen e të dhënave personale dhe bankare, si dhe përvetësimin e paligjshëm të fondeve nga llogaritë e qytetarëve.

Skemat e mashtrimit kibernetik përmes mesazheve telefonike janë përhapur më parë, ndërsa autoritetet kanë ndërmarrë hapa për të informuar publikun rreth rreziqeve që kanosen nga keqpërdorimi i emrave të institucioneve financiare të njohura në vend.

Sipas Policisë së Shtetit, qytetarët njoftohen përmes këtyre mesazheve se duhet të kryejnë verifikimin e identitetit brenda një afati të shkurtër kohor, që sipas njoftimit zyrtar është zakonisht 24 ose 31 orë. Lidhjet elektronike ose linket e vendosura në përmbajtje të këtyre mesazheve nuk u përkasin faqeve zyrtare të bankave, por orientojnë përdoruesit drejt faqeve të falsifikuara të krijuara enkas për të përvetësuar të dhënat e tyre, njoftojnë burimet policore.

Kjo formë e mashtrimit kibernetik, e njohur ndryshe si “Smishing”, synon të shfrytëzojë besimin e qytetarëve ndaj institucioneve bankare dhe ndjesinë e urgjencës që krijohet nga afatet e vendosura në SMS, bën të ditur Policia e Shtetit. Nëpërmjet këtyre faqeve të rreme, autorët synojnë të sigurojnë të dhëna të ndjeshme, si numrat e kartave bankare, fjalëkalimet e shërbimeve bankare online dhe kodet e verifikimit, të cilat përdoren më pas për të siguruar akses të paautorizuar dhe për të kryer transaksione financiare në dëm të qytetarëve.

Strukturat e specializuara për Hetimin e Krimit Kibernetik pranë Policisë së Shtetit vijojnë punën për evidentimin dhe hetimin e këtyre veprimtarive kriminale, identifikimin e autorëve dhe parandalimin e dëmeve financiare ndaj qytetarëve, duke ftuar ata që kanë rënë viktimë të denoncojnë rastet dhe të ruajnë mesazhet, numrat dhe linket e dërguara.

Në kuadër të masave parandaluese, Policia e Shtetit u bën thirrje qytetarëve: «Mos klikoni në lidhjet elektronike që përmbajnë SMS-të e dyshimta, pavarësisht se në përmbajtjen e tyre mund të shfaqet emri i një banke të njohur. Mos jepni në asnjë rast të dhënat e kartave bankare, fjalëkalimet, PIN-et apo kodet e verifikimit në faqe të hapura përmes këtyre mesazheve. Mos u ndikoni nga mesazhet që vendosin afate kohore për verifikimin e identitetit apo paralajmërojnë kufizimin e shërbimeve bankare. Verifikoni çdo komunikim të dyshimtë drejtpërdrejt me bankën tuaj, nëpërmjet kanaleve zyrtare të komunikimit. Nëse keni vendosur të dhënat tuaja bankare në një lidhje të dyshimtë, kontaktoni menjëherë bankën për të kërkuar bllokimin e kartës apo të aksesit në llogari dhe raportoni rastin në Polici».