Prokuroria italiane kërkon 24 vite burg për vrasjen e Fatos Cenajt

Prokuroria italiane ka kërkuar 24 vite burg për 45-vjeçarin Moreno Violetto, i akuzuar për vrasjen e Fatos Cenajt, 58 vjeç, në Fontaniva të Padovës. Kërkesa u paraqit nga prokurorja Maria D’Arpa në përfundim të pretencës në Gjykatën e Assizes në Padova, ndërsa autori i dyshuar ka pranuar pjesërisht autorësinë e krimit.

Sipas akuzës, ngjarja nuk erdhi nga një konflikt mes dy familjeve, por nga një urrejtje e përgjithshme e autorit ndaj fqinjëve, ku shënjestra kryesore dyshohet se ishin vajza dhe dhëndri i viktimës. Prokurorja deklaroi gjatë seancës se «Fatos ishte viktima sakrifikuese më e lehtë dhe më e arritshme», duke përmendur edhe një përgjim ku Violetto i thoshte partneres së tij se «kështu trëndafilat do të vuajnë edhe pak».

Fatos Cenaj, ish-punonjës i burgjeve në Shqipëri, u qëllua me armë zjarri në kokë më 8 qershor 2025 teksa lëvizte me biçikletë dhe ndërroi jetë në spital pas tre ditësh. Ndonëse rrezikonte burgim të përjetshëm për shkak të rrethanave rënduese, akuza kërkoi dënimin me 24 vite duke marrë parasysh rrethanat lehtësuese.