Zvicër: Hakerët kërkojnë shpërblim pas sulmit kibernetik ndaj furnizuesit të Publica-s

Grupi i hakerëve Akira ka ndërmarrë një sulm kibernetik ndaj kompanisë PK Softech AG, e cila shërben si furnizuese e softuerëve për fondin federal zviceran të pensioneve Publica. Autorët e sulmit kanë kërkuar shpërblim dhe kanë kërcënuar me publikimin ose rishitjen e të dhënave të ndjeshme të vjedhura, ndërsa Departamenti Federal i Mbrojtjes i Zvicrës dhe strukturat e tjera federale janë vënë në dijeni të situatës. Megjithëse fondi Publica dhe kompania softuerike deklaruan se nuk kanë pranuar kërkesa për pagesë, eksperti i sigurisë kibernetike Nicolas Mayencourt vlerëson se kërkesa mund t'i jetë drejtuar drejtpërdrejt qeverisë federale.

Rasti përbën shqetësim të lartë për shkak të dyshimeve se në duart e kriminelëve kanë përfunduar informacione për pjesëtarë të Shërbimit Federal të Inteligjencës dhe Zyrës Federale të Policisë, përfshirë zyrtarë që veprojnë brenda dhe jashtë vendit me identitete të rreme. Zëdhënësja e Këshillit Federal, Nicole Lamon, konfirmoi se çështja u diskutua në një takim konfidencial, ndërsa autoritetet dyshohet se kanë ndërmarrë masa shtesë sigurie që përfshijnë mbrojtjen e personelit dhe mundësinë e kthimit të disa agjentëve nga misionet jashtë vendit. Eksperti Mayencourt paralajmëron se grupet kriminale mund t'ua shesin të dhënat e ndjeshme shërbimeve të huaja të inteligjencës dhe kujton se institucionet shtetërore zvicerane kanë kryer pagesa të ngjashme edhe në të kaluarën.