Prokuroria në Itali kërkon 24 vite burg për vrasjen e shqiptarit

Prokuroria italiane ka kërkuar një dënim prej 24 vitesh burg për 45-vjeçarin Moreno Violetto, i cili akuzohet për vrasjen e Fatos Cenajt. Kërkesa formale u paraqit nga prokurorja Maria Ignazia D’Arpa, ndërsa trupi gjykues pritet të japë vendimin më 20 janar 2027. Autori i dyshuar, i cili ka pranuar pjesërisht autorësinë e krimit, akuzohet për vrasje me dashje, të kryer me paramendim dhe për motive të dobëta, pavarësisht se akuza ka marrë parasysh disa rrethana lehtësuese.

Ngjarja e rëndë ndodhi më 8 qershor 2025 në Fontanivë të Padovës, ku Fatos Cenaj, ish-punonjës sigurie, u qëllua me armë zjarri në kokë nga një distancë e afërt ndërsa po lëvizte me biçikletë, duke ndërruar jetë pas disa ditësh në spital. Sipas hetimeve të kryera nga Karabinierët, viktimat dhe autori ishin fqinj dhe mes tyre kishte pasur konflikte të vazhdueshme për çështje fqinjësie. Prokurorja argumentoi se akti nuk erdhi thjesht nga një mosmarrëveshje personale, por pasqyronte një armiqësi më të gjerë të 45-vjeçarit ndaj banorëve të tjerë të zonës. Pas krimit, italiani u arrestua në dhjetor të vitit 2025, pasi dyshohet se u përpoq të krijonte një alibi duke u maskuar dhe duke manipuluar oraret e regjistruara nga kamerat e sigurisë në banesën e tij për të penguar hetimet.