Demo: 114.6 miliardë lekë për pushtetin vendor dhe digjitalizim në 2027

Projektbuxheti i vitit 2027 parashikon një fond prej 114.6 miliardë lekësh për pushtetin vendor, duke shënuar një rritje prej 2.4% krahasuar me vitin e kaluar. Gjatë prezantimit në Komisionin për Çështjet e Brendshme dhe të Mbrojtjes, ministri i Punëve të Brendshme, Ervin Demo, tha se transfertat nga Buxheti i Shtetit për njësitë e vetëqeverisjes vendore arrijnë në 49.4 miliardë lekë, ose 4% më shumë se një vit më parë. Transferta e pakushtëzuar e përgjithshme do të jetë 29.3 miliardë lekë me një rritje prej 5.2%, ndërsa transferta e pakushtëzuar sektoriale parashikohet në 19.9 miliardë lekë me rritje 2.4%.

Ministri Demo theksoi se prioritet do t'i kushtohet digjitalizimit të shërbimeve vendore, forcimit të kapaciteteve administrative dhe përgatitjes për reformën territoriale. Sipas tij, një projekt i financuar nga Banka Botërore do të nisë implementimin në disa bashki, duke filluar nga ajo e Tiranës, për të garantuar shërbime të digjitalizuara. Po ashtu, sistemi AFMIS do të krijojë një panel informues për ndjekjen në kohë reale të situatës financiare të çdo bashkie. Në seancë u trajtuan edhe çështjet e Policisë së Shtetit, ku ministri bëri të ditur se janë 9 punonjës të pezulluar, ndërsa rreth 50 raste po hetohen nga Agjencia e Mbikëqyrjes Policore.