PDK dhe LVV fajësojnë kreun e Dragashit për ngrohjen në shkolla
Opozita në Dragash kritikon udhëtimin zyrtar në Itali ndërsa shkollat mbeten pa ngrohje.
Redaksia ZHURMA · · 1 min lexim
Degët e Partisë Demokratike të Kosovës dhe Lëvizjes Vetëvendosje kanë drejtuar akuza të ashpra ndaj ekzekutivit komunal të Dragashit për shkak të mungesës së ngrohjes në mjediset arsimore. Reagimet e subjekteve opozitare erdhën në kohën kur Kryetari i Komunës, Bexhet Xheladini, bashkë me anëtarë të Kuvendit Komunal po qëndrojnë për një vizitë në Sicili të Italisë.
Sipas PDK-së, në Shkollën Fillore dhe të Mesme të Ulët “Sezai Surroi” në Bellobrad, mosfunksionimi i sistemit të ngrohjes po detyron nxënësit dhe mësimdhënësit të zhvillojnë mësimin në temperatura të ulëta. Nga ana tjetër, LVV ka kritikuar udhëtimin zyrtar, duke theksuar se megjithëse Komuna ka një kontratë trevjeçare për furnizim me pelet në vlerë prej 37,026 eurosh, ku vetëm për vitin 2026 janë paraparë 55 tonë pelet, nxënësit në qytet dhe fshatra vazhdojnë të ballafaqohen me mungesë ngrohjeje.
Opozita ka kërkuar ndërhyrje të menjëhershme dhe lënien anash të udhëtimeve jashtë vendit, duke kërkuar përgjegjësi nga kryetari dhe drejtoritë përkatëse për kushtet në shkolla.
